كيف حال أبوك ؟؟!!

 


كل ما قابلت واحد من الجماعة , وسأل عنك يقول لك : كيف الوالد ؟ ..... وبصراحة قعدت افكر وأقول : ليه ما يتغير السؤال ؟ يعني بدل ما يقول لك كيف حال الوالد .... يقول : كيف حالك مع أبوك ؟ سؤال أنا عارف إنه صعب على كل واحد مننا لأنه مهما تسوي ما توفي شيء من حق أبوك ومع هذا السؤال حبيت بعض الأسئلة وكل واحد يجاوبها مع نفسه ونخليهامراجعة مع نفسنا لأنه ممكن وانت تقرأ الرسالة يجيك إتصال فيه خبر إنك ماراح تقدر تصلح اللي بينك وبين أبوك لأنه حيقولك أبوك ماااااااااااااات وقتها ما بتقول إلا ياليت وليت .... عشان كذا خلونا نبدأ نسأل بعض :

تفتخر بأبوك ؟ لا ... لا تقول إيوا ..... لو مر أبوك الآن ودخل مقر عملك أو دراستك ... إيش أول ماحتحس فيه من داخلك ؟ وبتقول لكل اللي حوالينك " العمدة وصل " والا حتشوف أصحابك ونظرتهم لأبوك ؟ هذا هو إنك تفتخر بأبوك أو لا ..... نروح للسؤال الثاني ....

متى آخر مرة شفت أبوك ؟ ممكن تقول قبل خمس دقايق لكن قصدي شفته بمعنى جلست معاه وفكيت معاه أي موضوع بس عشان تتكلم معاه زي ماتفك موضوع مع أي ......... عشان تتكلم معا.... والكل فاهميني ... هذا للي ساكن قريب من بيت أبوه اجلس واستمتع مع أبوك ولو كان طبع أبوك ما يحب مع الأيام حيحب جلستك وراح تكسب فيها بعض الدعوات .... أما اللي ساكن بعيد عن أبوه ليه ما تغير الروتين بأنك تجي عنده كل جمعة أو خميس وتفاجئه بجيتك عنده غير هذي اليومين ومن دون اتصال أو موعد وأكيد راح يسأل غريبة إيش جابك اليوم وتقوله بصراحة وحشتوني وشوف نظرته لك ذاك الوقت .... ونروح للثالث ....

كلنا يبوس يد أبوه لمن يسلم عليه ( لكن اللي ما يبوس يد أبوه ما له كلا معايا في هذا الموضوع يحلها بعدين يكمل الباقي ) جربت وبُست رجل أبوك ؟ والله لها طعم غييييييييييير وجرب حتى لو تسوي حركة مزحة مع واحد من أخوانك أو أخواتك وزي التحدي وسويها ولك الحكم ... والله إمكن بهذي يرضى ويا حظك ضمنت باب من أبواب الجنة ...

الرابع : للي أبوه متوفي وحتى للي أبوه موجود ... متى سويت عمرة عن أبوك ؟ تصدقت عن أبوك ؟ ياخي لو جيت اليوم وتعشيت عندك ومعانا كم واحد راح تدفع أقل القليل خمسين ريال عشان العشاء .... طيب ما فكرت تمر على جمعية أو مؤسسة خيرية وتدفع هذي الخمسين صدقة جارية عن أبوك ... ولو ربنا موسع عليك وتحفر بير أو تشارك في مسجد عن أبوك حتى لو أبوك حي والله .. والله ... شيء يبقى فيه بر ما ينسِّي أبداً

كلامي هذا للي محترم أبوه أما اللي يرفع صوتك أو متخاصم مع أبوه أو ..... أو ..... هذا أقوله : كل المشاكل اللي تصير لك عشانك كذا مع أبوك جرب تعدل اللي بينك وبين أبوك تلاقي كل اللي حوالينك يصلح ويزبط من دون أي متاعب تعرف ليه لأنه حيدعيلك من دون ماتدري جربووووا .. وأنا معاكم راح أجرب ...